抖氣位

間唔中都會有啲新相識嘅朋友問我，我interview嘅時候係咪會專登要留難吓啲candidates，其實啲HR咁鍾意challenge 人，不如唔好叫人上去見啦!  即係咁，第一，HR都係打份工，我都要對老闆交代，做招聘嘅HR通常其中一個KPI就係睇有幾快可以fill 咗個位，若果我搵到個啱嘅candidate，我簡直想佢即刻番工，仲咩要專登留難佢呢? 第二，其實HR都有好多嘢做，我揀得上嚟見嘅candidates都一定係有potential嘅，如果唔係我仲咩要花時間做咁多嘢呢?  不過咁，interview 時我有時都會challenge candidates ，唔係因為我要留難佢，有時係因為我想睇吓個candidate 俾人challenge嘅時候會點樣回應，特別係一啲要對客或者要管人嘅職位，應對能力好緊要。另外，有時候係因為candidate講嘅嘢好似有啲前言不對後語，HR就要去問清楚啦。 當然，每間公司HR嘅style都唔同，可能有啲HR真係比較入戲而令人覺得好串咀，不過，作為 一個candidate 都係唔好駁咀為妙，無論佢堅係串定只試探你，你表現落落大方先顯得你有高EQ吖嘛!

如果你真係覺得唔化妝即係純樸，咁你真係思想純樸喇! 暫時我諗到唔使化妝嘅界別有社福界之外，我未諗到有咩行業會介意應徵者化妝，介意嘅只係化幾多同化幾濃! 見工要化妝嘅大前題並唔係要令你變到明星咁靚，所以唔係要喬裝，你都係做番你自己，不過就要令你望落感覺精神啲、順眼啲! (1) 遮瑕 除咗一啲天生麗質嘅個別例子之外，我諗每個女仔都總有啲要遮掩嘅缺憾啩? 最常見嘅就係膚色唔均勻同黑眼圈，遮咗之後即刻精神咗! (2) 變大 講緊嘅係畫眼線，加咗條眼線都可以令你雙眼變大同有神。不過我就唔贊成戴大眼仔，因為喺interview 時咁近去望，真係有啲誇張同唔自然，試過聽到不少 interviewer 都話呢類candidate 俾人一種突兀唔舒服嘅感覺。 (3) 修飾 尤其是無化開妝嘅女仔，好多時都漏咗要修飾吓條眼眉! 條眉有執過同無執過真係可以相差好遠架，條眉執得好，成個樣都會順眼好多。 咁點執呢? 修雜毛: 令整體感覺乾淨俐落 修眉型: 有啲女仔眼眉比較粗或者眉峰太起角，修幼啲啲圓啲啲可以增加你嘅親和力。如果你份工要"煞氣" 大啲就另計啦! 畫眉: 相反，有女仔眼眉比較淡，咁就要好好練習畫眉啦! 你試吓P走任何一個女明星條眉，你就即時知道有眉同無眉嘅分別! (4) 加色 今次講嘅係唇膏，都係嗰句，面青口唇白會令人覺得你唔精神，所以要加番啲色水，一般比較自然嘅顏色已經ok。記住, 就算嗰季好興鮮紅呀、深紅呀、深紫呢啲色，你都係留番自己去街先搽啦! 點解我無提眼影呢? 因為做咗以上幾樣，應該都已經令你望落精靈咗! 眼影可以無都ok，特別唔係化開妝嘅女仔，好多時都會搽眼影搽出事，唔係揀錯色就係化得唔對稱，再唔係就化到水腫咁。就算化開妝嘅，都要留意，earth tone 就最穩陣，因為你永遠唔知interviewer嘅接受程度有幾高! 如果有時間，最好就平日自己試吓妝，去一啲近似office嘅燈光望吓 (e.g. 學校library)。點解呢? 因為通常office 都係白燈，有時啲女仔喺室外或者黃燈嘅情況下望都ok，但係一入到室內個妝就即刻變濃咗。而且，interview 嘅時候同interviewer 都係比較近見面，太濃嘅妝真係唔係幾好囉! 記住，見工要化妝唔係要喬裝，只求望落感覺精神啲、順眼啲，自然

讀書嘅時候，好多同學仔都會做part-time。有啲part-time對同學第時搵工會有直接幫助，例如酒店、餐飲、銀行等，有相關工作經驗都會有優先! 不過有啲同學話佢哋都唔諗住做呢啲行業，自己又唔等錢使，所以就唔諗住做part-time，留番啲時間玩仲好! 當然，我都覺得大學時玩係好緊要，畢竟第時出嚟做嘢就係另一種玩法。之但係，盡可能都最好抽啲時間做吓part-time 或者暑期工，原因並唔係只為賺錢或者賺相關工作經驗，而係賺 "做嘢" 呢個經驗! 咩係"做嘢" 嘅經驗? 好難去形容，總之就係離開屋企學校，去一個地方係做錯嘢會俾人鬧、做慢啲又俾人催嘅環境! 喺呢度你可能會遇到一班令你獲益良多嘅好同事，又或者係一班凈係識老點你做嘢嘅卸膊怪。如果做client-facing嘅工就仲好玩，因為你可以親身體驗咩叫一樣米養百樣人，咩client 都有，沒有最騎呢，只有更騎呢! 而呢啲經驗寶貴嘅地方係讓你知道"出嚟做嘢"究竟係咩一回事，你可以話學多咗點樣同唔同背景嘅人溝通，可以話學識咗prioritize啲tasks (例如A同事要你影印，B同事叫你做Powerpoint，同時C經理又叫你買咖啡，你做邊樣先?!) 。 其實好多時你未必可以從一份part-time直接學到相關工作嘅知識，因為通常會安排俾part-time去做嘅都係一啲相對簡單、routine 嘅工作，但係你可以觀察你身邊嘅同事、上司，慢慢你就會留意到佢哋成功 (或者失敗、乞人憎) 嘅原因! 呢啲對你以後做人做事都好有用!

好多朋友都有問我，resume 係咪要貼相架? 通常我都會反問"咁你覺得人哋睇咗你張相之後會唔會增加咗請你嘅機會吖?" 其實除非個job ad 有特別講明，一般嚟講貼唔貼都無所謂。如果你自己唔comfortable貼嘅話，咁就唔使啦! 但係如果你想貼的話，都要好好留意以下幾點。 (1) 太表現真我 除非你申請嘅工作要求你好有個性，好creative，如果唔係，對一般嘅寫字樓工嚟講，以上三個都係錯誤示範! 都係正正經經影吧啦! (2) 自拍 宜家手機影相咁方便，都多咗好多人自拍。話明自拍，無人提醒你就自己提自己要笑吓啦! 太木口木面會俾人難以相處嘅感覺，但係笑得太多又好易變咗輕佻。最後，就算表情ok都未夠，要留意吓啲燈光會唔會太黑或者有陰陽面，背景係咪太雜亂。 (3) 衣著化妝 化好妝set埋頭，今次ok喇? Umm... 我諗無人會著到上面個女仔咁見工啩? 同樣地影相都唔好咁著啦! 另外，雖然我都覺得女仔最好都係要化少少妝，不過淡妝已經足夠，太濃反而會俾人太假嘅感覺。 如果真係唔知點影，其實就可以考慮吓俾錢人哋賺，因為近年都多咗啲專幫人影見工相嘅公司，可以諗諗。

首先，我覺得同事同朋友係唔同嘅! 有啲同事可以變成朋友，但係有啲始終會有距離。 我會話如果可以响辦公室識到真心朋友係bonus，就算只識到同事都好正常! 始終職場係一個充滿利益衝突嘅地方，有時太親近嘅關係或者俾人知道好多私人嘢嘅時候反而唔方便。

時間呢個題目，我真係好想講，因為實在有唔少應徵者犯咗呢個錯誤! 遲到 呢個真係大忌， 印象分即時扣咗! 如果你話第一次嚟呢座大廈，所以用多咗時間先搵到，咁我會覺得你準備功夫做得唔夠，宜家上網話咁易就搵到即時地圖教你行，而且，明知自己未去過嘅地方就應該預多啲時間啦! 如果你話落大雨塞車，同樣，你唔知好多時落大雨就會塞車咩? 點解唔早啲出門口? 當然，有時候真係有唔同原因令你遲到嘅，最重要係你要講聲，明知自己趕唔切，就早啲打電話俾interviewer 話佢知你會比約定時間遲幾多先會到，道咗歉先，等人哋覺得你係有交帶嘅。仲有，到見面時可以再道歉 ，呢啲係基本禮貌。正如如果我自己遲咗開始interview, 我都會同candidate 講唔好意思一樣。 早到 既然遲到唔得，咁早到實無死啦! 你咁諗只係啱咗一半，如果太早到有時候反而會令interviewer帶嚟不便! 需知道好多公司未必有HR專用嘅interview room，好多時只係同其他部門一齊搶meeting room ，係meeting room 通常都爆嘅情況下，如果你咁早到我都唔知點安置你。 其實通常早到五至十分鐘就最穩陣，但係有時真係預早咗，咁點呢? 如果附近有商場就最好，唔係叫你去shopping，而係去廁所方便一吓同埋執返正個樣! 特別是夏天，抺吓汗、補補妝，即刻自信心返哂嚟!

即係咁，如果有人話面試時只睇應徵者工作能力和經驗，一啲都唔理佢嘅衣著，咁佢一定係呃你!  記住，我講緊嘅係衣著打扮，唔係講個人樣貌。而且，應徵者嘅衣著可以話俾我哋知好多嘢，我點會唔睇! 就分享以下幾樣。 (1) 識唔識規矩 一啲professional service firm或者banking-/financial- related 嘅公司都會期望candidate 著得formal 啲 ，即係要著成套suit，你睇吓平日中環啲人著成點就知! 男嘅三十幾度仲要著住件披，女嘅就個個抖零踭。而一啲傳統啲嘅公司亦都可能會想佢嘅員工會著得穩重啲。 相反，有啲公司講求活力，佢咃會希望員工著得hip啲，有型啲，如果你著得太老成穩重反而會扣分。 (2) 你嘅衣著有說服力嗎? 有啲工種會期望應徵者可以表現到自己個性，例如一啲creative嘅工作。最明顯嘅就係 designer。當然，你表現到嘅個性係應該可以match到公司嘅style 啦! 以fashion designer 為例，大家對G2000 同 adidas 嘅designers 應該會有唔同expectation啩? 而通常一啲要客戶服務嘅工作就希望應徵者可以俾到人可靠，有親和力嘅感覺。 (3) 你啱唔啱我哋公司culture 架? 尤其是一啲大brand，通常佢哋都有好強自己嘅culture，例如Apple、Facebook 、 Nike、 Adidas，你嘅衣著某程度都會反映到你可唔可以fit in 到佢咃嘅公司文化。 (4) 細路，你係咪嚟踩場呀? 唉... ... 其實呢個都有啲同你識唔識得尊重場合同夠唔夠細心有關，呢啲情況响fashion/ apparel公司尤其要小心。試想像，你著住A仔嘅波衫波鞋去N記見工 ;  又或者去箍肚池見工，但係揹住個LB袋，咁你話你想點? 口裏說自己有幾鍾意個brand，但身體卻很誠實... ...  話雖如此，有時候真係無嗰個brand嘅product，咁係咪要去買個呀? 當然，你覺得你等咗呢個藉口好耐，咁你就隨便啦，如果唔係，就諗吓有咩辦法避重就輕。例如，可唔可以問朋友借?你有無佢啲姊妹brand? 又或者最簡單，唔好著direct competitor