About 抖氣位


返工總有啲時候忙到抽筋，有時候未必係不停做不停開會嗰種忙，有時候可能係要不停咁諗"橋"， 不停咁對住唔同嘅人見招拆招， 有時精神上嘅勞動仲攰過體力勞動。無論係邊種攰，我哋都要搵到自己嘅抖氣位。就好似游水咁，上一上水吸啖氣再繼績游。


有啲人嘅抖氣位就係去打邊爐，有啲就係去廁所，有啲就係周圍同人吹水，而我嘅抖氣位就係落街買咖啡。有啲人會覺得好奇怪，明明公司有咖啡機，點解仲要花幾廿蚊落街買? 原因好簡單，呢幾廿蚊其實係買嗰十五分鐘嘅抖氣位。
有時候，有啲同事想搵我傾計，都覺得响office傾無咁方便，所以通常都會去附近啲cafe傾，cafe 就成為我哋嘅抖氣位。 (um.... 好多人覺得如果有人同HR傾密計，唔係打小報告就係俾人訓話 -_-|| )


宜家呢個抖氣位，就希望同大家有一個地方可以呻吓，交流吓! 


想一邊抖氣一邊吹水嘅亦可以到 FACEBOOK



Comments

New comments are not allowed.

Popular posts from this blog

我係咪要俾足通知期先走得? 咩係buy out?

Image
之前講過點樣計通知期 (按此重溫) ，但係新公司想我早啲番工，咁我有無辦法可以早啲走呢?  聽過有啲candidate 話宜家公司嘅HR話唔俾佢走，係咪真架? 答案當然係唔可以唔俾走啦!邊有公司可以夾硬要你留低呢? 不過，如果唔俾足通知期，就要用錢去解決，即係俾代通知金! 只要你肯俾錢，公司就唔可以話唔俾你走。例如你想即走，連一個月嘅通知期都唔俾，咁你就要賠番一個月錢俾公司。知但係，就算你有錢，係咪真係要走得咁急呢?  雖然可能新公司個offer真係好好又好想你早啲join，你都要睇下咁樣對宜家個老細做成幾大不便，會唔會都俾番兩、三個禮拜通知? 等大家可以有handover，可以好嚟好去。呢個世界好細，你永遠唔知幾時會再撞番呢個老細! 另外，有啲candidate 話新公司肯buy out佢，唔知係咩意思。Buy out 嘅意思係新公司會幫你俾你份代通知金。不過要留意兩樣嘢: 第一，好多公司會以sign-on bonus 嘅形式去俾舊錢你，咁呢舊錢會係taxable income ，你第時有機會交多咗稅。第二，新公司又點會白白俾錢你? 所以通常會有binding，即係你要留喺公司一段時間 ，例如一年，如果你喺一年內走，咁你就要賠番錢俾公司，有可能要成舊錢賠，有可能係按時間比例，要睇吓你同間公司點傾。所以，唔好見人哋話幫你俾錢就咩都唔理呀。
Read more

究竟遞信後幾時先走得?

Image
三、四月呢啲時間通常都已經派左bonus同知道有無得加人工，好多同事又開始留意有無得轉吓環境。不過去到真係要遞信嘅時候，唔少人都搞唔清究竟自己遞信後即係幾時last day，好多時封辭職信上面嘅日期都寫錯。 首先，拎自己份僱傭合約出嚟望吓，因為通常都有一個部份係關於終止僱傭關係，會列明通知期係幾耐。常見嘅合約喺試用期頭一個月內係唔需要通知期，可以即走，第二同第三個月就七日通知，過咗試用期就一個月通知。(以上嘅只係一般比較常見嘅通知期安排，所以一定好好keep住份合約，有需要就隨時可能攞嚟睇。) 咁即係點計last day呢? 假設我已經過咗試用期需要一個月通知，如果我2018年3月19日遞信，咁我一個月後就可以終止僱傭合約，即係4月19日就同公司再無僱傭關係，呢個係 termination effective date，最後受僱日期 (last employment date) 就會係之前一日,即係2018年4月18 日，如果你係番星期一至五嘅寫字樓工的話，咁4月18日亦都係你嘅最後工作日 (last working date)， 又如果我2018年3月23日遞信，合約終止生效日期 (termination effective date) 就係一個月後，即4 月23日，最後受僱日期 (last employment date)就係4月22日。不過因為4月22號係星期日，所以最後工作日 (last working date)就係4月20日星期五。 呢幾個日期一定要搞清楚，last employment date 呢日你仲係公司員工，仲會出公司糧，termination effective date 呢日你就再唔係呢間公司嘅人。
Read more

見工著咩衫 - 男生篇

Image
之前有講過見工時嘅衣著會可以話俾interviewer知好多嘢 ，今次再講吓仲有咩細節位要留意。 其實著咩衫好視乎你要見咩公司、見咩人同見咩位，所以見工之前一定要做吓功課。一般嚟講，如果你見一啲傳統嘅公司，就可以留意以下幾點。 男生 髮型: 愈簡單愈好，但唔等如唔梳頭，不過就唔好gel得太勁，唔好俾人一種太花巧嘅感覺。 衣著: 普通恤衫西褲就最穩陣，吊腳西褲唔著襪宜家係好興，不過未必人人接受，所以都係著番對襪啦! 不過，著襪都有學問，深色 (例如黑、深藍、深灰) 一般都安全，白襪就... ...奇怪咗少少。仲有，有啲嘢真係唔懶得，就係要熨衫，咁樣先至俾人一個整潔嘅感覺。 剃鬚: 除非你係有留鬚同埋有修剪，如果唔係，你就記得要剃鬚，否則又係可能會俾人唔整齊嘅感覺。 公事包: 好多男仔都未必有一個正正經經嘅公事包，唔緊要，但至少要有一個正正經經嘅背囊。有啲男仔會兩手空空剩係拎住個銀包上嚟，俾人感覺太casual同唔重視個interview咁，因為即係連任何CV, reference letters都無帶。有啲男仔就好啲,會揹個做運動嘅背囊，不過，你想像吓你一身西裝打扮但係揹個運動袋，咁就好似唔係咁襯! 其實唔一定要買咩名牌，一個簡簡單單浄深色，類似Muji、Porter嘅款式都已經可以。 總言之，最緊要俾到人一種乾淨俐落，精精神神嘅印象就OK.
Read more