Posts

見工著咩衫 ?

-
Image
即係咁，如果有人話面試時只睇應徵者工作能力和經驗，一啲都唔理佢嘅衣著，咁佢一定係呃你!  記住，我講緊嘅係衣著打扮，唔係講個人樣貌。而且，應徵者嘅衣著可以話俾我哋知好多嘢，我點會唔睇! 就分享以下幾樣。 (1) 識唔識規矩 一啲professional service firm或者banking-/financial- related 嘅公司都會期望candidate 著得formal 啲 ，即係要著成套suit，你睇吓平日中環啲人著成點就知! 男嘅三十幾度仲要著住件披，女嘅就個個抖零踭。而一啲傳統啲嘅公司亦都可能會想佢嘅員工會著得穩重啲。 相反，有啲公司講求活力，佢咃會希望員工著得hip啲，有型啲，如果你著得太老成穩重反而會扣分。 (2) 你嘅衣著有說服力嗎? 有啲工種會期望應徵者可以表現到自己個性，例如一啲creative嘅工作。最明顯嘅就係 designer。當然，你表現到嘅個性係應該可以match到公司嘅style 啦! 以fashion designer 為例，大家對G2000 同 adidas 嘅designers 應該會有唔同expectation啩? 而通常一啲要客戶服務嘅工作就希望應徵者可以俾到人可靠，有親和力嘅感覺。 (3) 你啱唔啱我哋公司culture 架? 尤其是一啲大brand，通常佢哋都有好強自己嘅culture，例如Apple、Facebook 、 Nike、 Adidas，你嘅衣著某程度都會反映到你可唔可以fit in 到佢咃嘅公司文化。 (4) 細路，你係咪嚟踩場呀? 唉... ... 其實呢個都有啲同你識唔識得尊重場合同夠唔夠細心有關，呢啲情況响fashion/ apparel公司尤其要小心。試想像，你著住A仔嘅波衫波鞋去N記見工 ;  又或者去箍肚池見工，但係揹住個LB袋，咁你話你想點? 口裏說自己有幾鍾意個brand，但身體卻很誠實... ...  話雖如此，有時候真係無嗰個brand嘅product，咁係咪要去買個呀? 當然，你覺得你等咗呢個藉口好耐，咁你就隨便啦，如果唔係，就諗吓有咩辦法避重就輕。例如，可唔可以問朋友借?你有無佢啲姊妹brand? 又或者最簡單，唔好著direct competitor
1 comment
Read more

見工著咩衫 - 男生篇

-
Image
之前有講過見工時嘅衣著會可以話俾interviewer知好多嘢 ，今次再講吓仲有咩細節位要留意。 其實著咩衫好視乎你要見咩公司、見咩人同見咩位，所以見工之前一定要做吓功課。一般嚟講，如果你見一啲傳統嘅公司，就可以留意以下幾點。 男生 髮型: 愈簡單愈好，但唔等如唔梳頭，不過就唔好gel得太勁，唔好俾人一種太花巧嘅感覺。 衣著: 普通恤衫西褲就最穩陣，吊腳西褲唔著襪宜家係好興，不過未必人人接受，所以都係著番對襪啦! 不過，著襪都有學問，深色 (例如黑、深藍、深灰) 一般都安全，白襪就... ...奇怪咗少少。仲有，有啲嘢真係唔懶得，就係要熨衫，咁樣先至俾人一個整潔嘅感覺。 剃鬚: 除非你係有留鬚同埋有修剪，如果唔係，你就記得要剃鬚，否則又係可能會俾人唔整齊嘅感覺。 公事包: 好多男仔都未必有一個正正經經嘅公事包，唔緊要，但至少要有一個正正經經嘅背囊。有啲男仔會兩手空空剩係拎住個銀包上嚟，俾人感覺太casual同唔重視個interview咁，因為即係連任何CV, reference letters都無帶。有啲男仔就好啲,會揹個做運動嘅背囊，不過，你想像吓你一身西裝打扮但係揹個運動袋，咁就好似唔係咁襯! 其實唔一定要買咩名牌，一個簡簡單單浄深色，類似Muji、Porter嘅款式都已經可以。 總言之，最緊要俾到人一種乾淨俐落，精精神神嘅印象就OK.
Post a Comment
Read more

我係咪要俾足通知期先走得? 咩係buy out?

-
Image
之前講過點樣計通知期 (按此重溫) ，但係新公司想我早啲番工，咁我有無辦法可以早啲走呢?  聽過有啲candidate 話宜家公司嘅HR話唔俾佢走，係咪真架? 答案當然係唔可以唔俾走啦!邊有公司可以夾硬要你留低呢? 不過，如果唔俾足通知期，就要用錢去解決，即係俾代通知金! 只要你肯俾錢，公司就唔可以話唔俾你走。例如你想即走，連一個月嘅通知期都唔俾，咁你就要賠番一個月錢俾公司。知但係，就算你有錢，係咪真係要走得咁急呢?  雖然可能新公司個offer真係好好又好想你早啲join，你都要睇下咁樣對宜家個老細做成幾大不便，會唔會都俾番兩、三個禮拜通知? 等大家可以有handover，可以好嚟好去。呢個世界好細，你永遠唔知幾時會再撞番呢個老細! 另外，有啲candidate 話新公司肯buy out佢，唔知係咩意思。Buy out 嘅意思係新公司會幫你俾你份代通知金。不過要留意兩樣嘢: 第一，好多公司會以sign-on bonus 嘅形式去俾舊錢你，咁呢舊錢會係taxable income ，你第時有機會交多咗稅。第二，新公司又點會白白俾錢你? 所以通常會有binding，即係你要留喺公司一段時間 ，例如一年，如果你喺一年內走，咁你就要賠番錢俾公司，有可能要成舊錢賠，有可能係按時間比例，要睇吓你同間公司點傾。所以，唔好見人哋話幫你俾錢就咩都唔理呀。
Post a Comment
Read more

究竟遞信後幾時先走得?

-
Image
三、四月呢啲時間通常都已經派左bonus同知道有無得加人工，好多同事又開始留意有無得轉吓環境。不過去到真係要遞信嘅時候，唔少人都搞唔清究竟自己遞信後即係幾時last day，好多時封辭職信上面嘅日期都寫錯。 首先，拎自己份僱傭合約出嚟望吓，因為通常都有一個部份係關於終止僱傭關係，會列明通知期係幾耐。常見嘅合約喺試用期頭一個月內係唔需要通知期，可以即走，第二同第三個月就七日通知，過咗試用期就一個月通知。(以上嘅只係一般比較常見嘅通知期安排，所以一定好好keep住份合約，有需要就隨時可能攞嚟睇。) 咁即係點計last day呢? 假設我已經過咗試用期需要一個月通知，如果我2018年3月19日遞信，咁我一個月後就可以終止僱傭合約，即係4月19日就同公司再無僱傭關係，呢個係 termination effective date，最後受僱日期 (last employment date) 就會係之前一日,即係2018年4月18 日，如果你係番星期一至五嘅寫字樓工的話，咁4月18日亦都係你嘅最後工作日 (last working date)， 又如果我2018年3月23日遞信，合約終止生效日期 (termination effective date) 就係一個月後，即4 月23日，最後受僱日期 (last employment date)就係4月22日。不過因為4月22號係星期日，所以最後工作日 (last working date)就係4月20日星期五。 呢幾個日期一定要搞清楚，last employment date 呢日你仲係公司員工，仲會出公司糧，termination effective date 呢日你就再唔係呢間公司嘅人。
Post a Comment
Read more

點解HR咁鍾意interview時留難啲candidate? 佢哋變態架?

-
Image
間唔中都會有啲新相識嘅朋友問我，我interview嘅時候係咪會專登要留難吓啲candidates，其實啲HR咁鍾意challenge 人，不如唔好叫人上去見啦!  即係咁，第一，HR都係打份工，我都要對老闆交代，做招聘嘅HR通常其中一個KPI就係睇有幾快可以fill 咗個位，若果我搵到個啱嘅candidate，我簡直想佢即刻番工，仲咩要專登留難佢呢? 第二，其實HR都有好多嘢做，我揀得上嚟見嘅candidates都一定係有potential嘅，如果唔係我仲咩要花時間做咁多嘢呢?  不過咁，interview 時我有時都會challenge candidates ，唔係因為我要留難佢，有時係因為我想睇吓個candidate 俾人challenge嘅時候會點樣回應，特別係一啲要對客或者要管人嘅職位，應對能力好緊要。另外，有時候係因為candidate講嘅嘢好似有啲前言不對後語，HR就要去問清楚啦。 當然，每間公司HR嘅style都唔同，可能有啲HR真係比較入戲而令人覺得好串咀，不過，作為 一個candidate 都係唔好駁咀為妙，無論佢堅係串定只試探你，你表現落落大方先顯得你有高EQ吖嘛!
Post a Comment
Read more

唔化妝即係純樸，化妝即係喬裝!

-
Image
如果你真係覺得唔化妝即係純樸，咁你真係思想純樸喇! 暫時我諗到唔使化妝嘅界別有社福界之外，我未諗到有咩行業會介意應徵者化妝，介意嘅只係化幾多同化幾濃! 見工要化妝嘅大前題並唔係要令你變到明星咁靚，所以唔係要喬裝，你都係做番你自己，不過就要令你望落感覺精神啲、順眼啲! (1) 遮瑕 除咗一啲天生麗質嘅個別例子之外，我諗每個女仔都總有啲要遮掩嘅缺憾啩? 最常見嘅就係膚色唔均勻同黑眼圈，遮咗之後即刻精神咗! (2) 變大 講緊嘅係畫眼線，加咗條眼線都可以令你雙眼變大同有神。不過我就唔贊成戴大眼仔，因為喺interview 時咁近去望，真係有啲誇張同唔自然，試過聽到不少 interviewer 都話呢類candidate 俾人一種突兀唔舒服嘅感覺。 (3) 修飾 尤其是無化開妝嘅女仔，好多時都漏咗要修飾吓條眼眉! 條眉有執過同無執過真係可以相差好遠架，條眉執得好，成個樣都會順眼好多。 咁點執呢? 修雜毛: 令整體感覺乾淨俐落 修眉型: 有啲女仔眼眉比較粗或者眉峰太起角，修幼啲啲圓啲啲可以增加你嘅親和力。如果你份工要"煞氣" 大啲就另計啦! 畫眉: 相反，有女仔眼眉比較淡，咁就要好好練習畫眉啦! 你試吓P走任何一個女明星條眉，你就即時知道有眉同無眉嘅分別! (4) 加色 今次講嘅係唇膏，都係嗰句，面青口唇白會令人覺得你唔精神，所以要加番啲色水，一般比較自然嘅顏色已經ok。記住, 就算嗰季好興鮮紅呀、深紅呀、深紫呢啲色，你都係留番自己去街先搽啦! 點解我無提眼影呢? 因為做咗以上幾樣，應該都已經令你望落精靈咗! 眼影可以無都ok，特別唔係化開妝嘅女仔，好多時都會搽眼影搽出事，唔係揀錯色就係化得唔對稱，再唔係就化到水腫咁。就算化開妝嘅，都要留意，earth tone 就最穩陣，因為你永遠唔知interviewer嘅接受程度有幾高! 如果有時間，最好就平日自己試吓妝，去一啲近似office嘅燈光望吓 (e.g. 學校library)。點解呢? 因為通常office 都係白燈，有時啲女仔喺室外或者黃燈嘅情況下望都ok，但係一入到室內個妝就即刻變濃咗。而且，interview 嘅時候同interviewer 都係比較近見面，太濃嘅妝真係唔係幾好囉! 記住，見工要化妝唔係要喬裝，只求望落感覺精神啲、順眼啲，自然
Post a Comment
Read more

大學時做咩part-time可以幫到畢業後搵工?

-
Image
讀書嘅時候，好多同學仔都會做part-time。有啲part-time對同學第時搵工會有直接幫助，例如酒店、餐飲、銀行等，有相關工作經驗都會有優先! 不過有啲同學話佢哋都唔諗住做呢啲行業，自己又唔等錢使，所以就唔諗住做part-time，留番啲時間玩仲好! 當然，我都覺得大學時玩係好緊要，畢竟第時出嚟做嘢就係另一種玩法。之但係，盡可能都最好抽啲時間做吓part-time 或者暑期工，原因並唔係只為賺錢或者賺相關工作經驗，而係賺 "做嘢" 呢個經驗! 咩係"做嘢" 嘅經驗? 好難去形容，總之就係離開屋企學校，去一個地方係做錯嘢會俾人鬧、做慢啲又俾人催嘅環境! 喺呢度你可能會遇到一班令你獲益良多嘅好同事，又或者係一班凈係識老點你做嘢嘅卸膊怪。如果做client-facing嘅工就仲好玩，因為你可以親身體驗咩叫一樣米養百樣人，咩client 都有，沒有最騎呢，只有更騎呢! 而呢啲經驗寶貴嘅地方係讓你知道"出嚟做嘢"究竟係咩一回事，你可以話學多咗點樣同唔同背景嘅人溝通，可以話學識咗prioritize啲tasks (例如A同事要你影印，B同事叫你做Powerpoint，同時C經理又叫你買咖啡，你做邊樣先?!) 。 其實好多時你未必可以從一份part-time直接學到相關工作嘅知識，因為通常會安排俾part-time去做嘅都係一啲相對簡單、routine 嘅工作，但係你可以觀察你身邊嘅同事、上司，慢慢你就會留意到佢哋成功 (或者失敗、乞人憎) 嘅原因! 呢啲對你以後做人做事都好有用!
Post a Comment
Read more

究竟 resume 使唔使貼相?

-
Image
好多朋友都有問我，resume 係咪要貼相架? 通常我都會反問"咁你覺得人哋睇咗你張相之後會唔會增加咗請你嘅機會吖?" 其實除非個job ad 有特別講明，一般嚟講貼唔貼都無所謂。如果你自己唔comfortable貼嘅話，咁就唔使啦! 但係如果你想貼的話，都要好好留意以下幾點。 (1) 太表現真我 除非你申請嘅工作要求你好有個性，好creative，如果唔係，對一般嘅寫字樓工嚟講，以上三個都係錯誤示範! 都係正正經經影吧啦! (2) 自拍 宜家手機影相咁方便，都多咗好多人自拍。話明自拍，無人提醒你就自己提自己要笑吓啦! 太木口木面會俾人難以相處嘅感覺，但係笑得太多又好易變咗輕佻。最後，就算表情ok都未夠，要留意吓啲燈光會唔會太黑或者有陰陽面，背景係咪太雜亂。 (3) 衣著化妝 化好妝set埋頭，今次ok喇? Umm... 我諗無人會著到上面個女仔咁見工啩? 同樣地影相都唔好咁著啦! 另外，雖然我都覺得女仔最好都係要化少少妝，不過淡妝已經足夠，太濃反而會俾人太假嘅感覺。 如果真係唔知點影，其實就可以考慮吓俾錢人哋賺，因為近年都多咗啲專幫人影見工相嘅公司，可以諗諗。
Post a Comment
Read more